22 de novembro de 2009

NOVAS RECENTES NOS PENDELLOS

Este blog é visitado por bastantes aqualatenses. Pensando nos que viven lonxe, vou insertando noticias do acontecer cotián na vila ou no concello, sen pretensións xornalísticas. Igualmente, aproveito esta páxina como crónica do acontecer dos Pendellos, ese gran referente de vila de feira que queremos potenciar e valorizar. Na Asociación Amigos dos Pendellos seguimos a traballar arreo nesa dirección. A meta que xustificaría todos os esforzos sería ver culminada a restauración e todos os espazos restaurados dedicados á feira, ao museo, a actividades hostaleiras, comerciais e culturais.
Con ese motivo no pasado mes de outubro unha comisión acudiu á Deputación de Pontevedra e o pasado xoves 19 outra comisión foi recibida polo Director Xeral de Patrimonio Cultural, D. Xosé Manuel Rey Pichel (na foto superior). A ambos organismos pedímoslles que sigan a executar os orzamentos acordados e que, superadas estas fases, continúen ata completar a restauración integral do recinto. O Director de Patrimonio amosou interese por vir coñecer o recinto, que a priori lle parece interesantísimo.
Hai dez días comezaron as obras da segunda fase, na que se acometerán as instalacións subterráneas (electricidade, alumeado público, auga, desaugues, pluviais, canalización de telecomunicacións...), dedicarase un pendello a centralizar as instalacións e restauraranse catro pendellos-expositores. Tamén se dotará á metade do recinto dun novo pavimento mixto (pedra abuxardada e irregular e terra). Con este novo pavimento preténdese mellorar a mobilidade e rebaixar os niveis ás cotas primitivas.
Arquetas, tubos de canalización eléctrica, tubos de drenaxes, dumpers, retroescavadoras, etc xa lle imprimen ritmo ás obras.
Para a miña sorpresa, descubro despois das primeiras escavacións, que o solo é moito menos pedroso do que imaxinabamos.







Con enorme desagrado tamén descubrimos nun contramostrador dun pendello esta "lareira" tan fóra de contexto e o plástico negro no mostrador paralelo actuando de parede protectora. Para montar a farra nocturna. Quen fose. Inaceptable. Amigos dos Pendellos, Concello, Deputación, Consellería e arquitectos dedicando cartos, ilusións, esforzos e algúns, moi poucos, carentes de sensibilidade para saber respectar este espazo público, humilde e solemne ao mesmo tempo.

2 comentarios:

  1. o teu blog e todo un documento extendido cara o mundo, falando dos pendellos, do teu pobo...
    iso e amor e dedicación!
    noraboa.

    ResponderEliminar
  2. E pensar que hai uns anos estivemos buscando pendello coma tolos para poñer nun blog de insti!!!
    http://pendellos.blogspot.com/

    pasaron os anos, creo que o blog morreu, pero hoxe as túas fotos leváronme ata aló.

    Un grato paseo cos meus bolechas de fondo (eu tamén son fan dos bolechas aínda sendo senior;))

    Un saúdo

    ResponderEliminar