Os bautizos eran así no meu pobo, Agolada. Facíanse na tardiña con cerimonia independente, un ou dous días despois do nacemento. Acudían os familiares máis achegados, os padriños, o pai do bebé (a nai non acudía por estar recuperándose do recente parto) e a rapazallada do pobo case ao completo. Esta asistencia non era casual, os rapaces esperaban a chuvia de caramelos con que o papá do bautizado e os padriños trasladaban a alegría polo advimento do novo membro da familia, nos momentos posteriores ao bautizo e á sesión de fotos no exterior.
O neno bautizado nesta ocasión puxéronlle un nome real, pero na vila aínda hoxe é coñecido por Toto. A fotografía de Manuel Galego Iglesias pode servirnos tamén para facer un especial recordatorio ao crego -recentemente falecido- tío do bautizado e moi coñecido e aprezado na vila, Amalio Cumplido (cuarto pola dereita na fila de arriba). Tamén nos vén a confirmar a imaxe que a distancia dos anos vai difuminando a memoria das caras e borrando os nomes de moitos daqueles nenos compañeiros de infancia, esa patria.
Ningún comentario:
Publicar un comentario