MEMORIA FOTOGRÁFICA RECUPERADA

Como agasallo de Reis, ofrezo hoxe a cantos lectores se acheguen a este blog estas seis imaxes inéditas do recinto antigo da feira de Agolada: Os Pendellos.
Eu inciara hai xa catro anos xestións diante do arquivo da Deputación de Pontevedra para saber do fotógrafo Novoa, quen editara unha imaxe dos Pendellos no libro "Pontevedra Agrícola" de Pedro Rial López. Naquela ocasión non deu froito a pescuda pois o edificio do arquivo da Deputación estaba en obras de restauración. Logo non volvín andar ese camiño. Quixo a fortuna que o amigo Julio López Regueiro durmise na miña casa de Agolada na noite do 29 de agosto pasado (Noite das Candeas). No cuarto onde durmiu hai un moble con libros onde descubriu con sorpresa o libro devandito. El sabía do autor. Á mañá seguinte baixou a almozar co libro na man. Díxenlle da xoia que contiña aquel libro: unha foto dos Pendellos, única, e tamén da miña primeira investigación e dos nulos resultados. Tamén lle expusen que se un fotógrafo profesional chegou antano aos Pendellos, de seguro que non tomaría unha soa imaxe porque o lugar goza dunha plasticidade especial e a arquitectura crea un conxunto único e irrepetible.
El lembrou que en Santiago había un fotógrafo con dito nome: Foto Novoa. Ofreceuse para seguir as investigacións. Axiña deu con el e mandou recado. Logo de algo máis dun mes de espera aseguráronnos que non conservaban nada anterior a 1973, data na que se lles anegara o estudio da rúa Preguntoiro.
Eu volvín insitir en que cabía a posibilidade de que houbese outro Novoa en Pontevedra. E Julio púxose en contacto coa familia de Pedro Rial e con diversas persoas relacionadas co ámbito da fotografía. Soubo que o tal Novoa fora socio do fotógrafo vigués Manuel García (Magar) e que o seu arquivo pasara a Foto Yáñez. Pero esa vía quedou esgotada. Logo chegou, vía Internet, a falar con D. Gerardo González Martín, quen coñecía á viúva de Manuel Novoa Rodríguez e ofreceuse a facer a xestión. Moi pronto nos mandou as mellores noticias: no arquivo da familia quedaban seis imaxes positivadas, que levaría a reproducir para enviarllas a Julio. Julio, con suma dilixencia, envioumas como agasallo de Nadal. O mellor regalo, as imaxes e o interese do amigo.
Sei, sabemos que estas imaxes recuperan a memoria que o tempo vai esborrallando na brétema dos anos, e con elas tecemos esa outra restauración que tamén necesitan os Pendellos. As dúas últimas imaxes deste vídeo que acabo de subir a Youtube, corresponden aos pendellos dos zoqueiros, lugar irrecuperable e descoñecido para os que teñan menos de corenta anos. Só nos quedarán destes pendellos a memoria dos máis vellos e esta imaxes e algunha outra que poida aparecer no futuro.
Só me resta expresarlles publicamente todo o meu agradecemento ao amigo Julio López Regueiro, que exerce a avogacía en Santiago e en Caldas de Reis, a D. Gerardo González Martín (xornalista que fora director da TVG) e á viúva de Manuel Novoa Rodríguez (fotógrafo vigués que faleceu hai 25 anos) e que un cuarto de século despois volve ser noticia en Agolada.
A imaxe que aparecía no libro é a que está na columna dereita deste blog desde hai meses.