A ACTUALIDADE DOS PENDELLOS DE AGOLADA

Sen dúbida, Os Pendellos de Agolada están de actualidade permanente. As obras de restauración xa executadas, conseguiron espertar a necesidade de darlle uso a este espazo tan entrañable coma singular. E vanse, aos poucos, incorporando sucesivas actividades, sen que de momento se acerte nun destino concreto e definitivo, como sería o desexable. O Corazón da Artesanía da Consellería de Industria e Turismo, a Mostra de Artesanía do Concello e a Deputación de Pontevedra, o campamento musical, o certame de Percusión de Odaiko, encontro de especialistas do Proxecto Symbios da Consellería deTraballo e Benestar, certames locais ou de asociacións veciñais ... contribúen a espertar ocasionalmente do letargo no que hiberna a este xigante da arquitectura popular.

Alédame moito que o Colexio Oficial de Arquitectos de Pontevedra (COAG) escollese este antigo mercado para celebrar o Día Mundial da Arquitectura. Necesítanse accións de todo tipo para apoiar e reivindicar este recinto ata conquerir a súa plena restauración e a súa posta en uso.

A definitiva restauración, ao meu entender, chegará cando:

- o Paseo da Parranda recupere os seus pendellos-expositores e o nivel orixinal do chan.

- os pavimentos das rúas, prazas e canellas acaden a uniformidade en todo o conxunto.

- se eliminen elementos arquitectónicos disruptivos.

- se recuperen para o dominio público espazos invadidos alegalmente.

- se consiga comprar e musealizar as cabalerizas da "casa da Audiencia".

- se consiga a protección BIC para todas as construcións de feira existentes en Agolada. Que inmenso erro sería perder calquera dos pendellos que aínda hai! O gran activo e atractivo de Agolada chámase PENDELLO.