PAZO DE BORRAXEIROS

Con total seguridade, o pazo de Borraxeiros é o edificio máis destacado na arquitectura civil do concello de Agolada. Foi construído no século XVII sobre as ruínas do antigo castelo medieval, que fora derrubado polos Irmandiños en 1467. O topónimo do lugar é A Torre, en evocación daquel castelo desde o que o Conde de Borraxeiros exercía o seu señorío nun amplo couto.
É desexable para este pazo un futuro no que se recuperen arquitectonicamente todos os elementos que o compoñen e se destine a un uso acorde coa súa prestancia.
Na foto superior vese a fachada leste, ameada, na que destacan os catro escudos coas armas dos Salgado e os Fuciños, a porta e a cheminea neoclásicas, a elegante balconada voada sobre traballadas ménsulas e os dous cubos circulares nos extremos.
A foto inferior está sacada desde o Castro Marcelín con teleobxectivo e ofrece unha perspectiva inédita do pazo. Nela advírtese a planta cuadrangular do edificio cun patio interior e o promontorio sobre a que se erguía o primitivo castelo.