Non estou en contra dos parques eólicos nin da enerxía limpa e renovable que nos aportan. Mais non obstante creo que hai que restrinxilos a zonas de pouco impacto visual, paisaxístico e medioambiental. Aproveitar o cumio do Farelo para chantar tres aeroxeradores pareceume sempre un despropósito. O cume que se ve ao fondo nesta foto é o denominado Pico, que está na serra do Farelo a un dous quilómetros da cima do Farelo. Coroando este Pico hai un castelete granítico que en termos xeomorfolóxicos se denomina tor. Alí, á beira, chantaron unha destas tarabelas metálicas. Tampouco me parece o mellor lugar.Unha vez feito, non queda máis remedio que resignarse e tirarlle proveito eléctrico e fotográfico. Eu apunteime ao fotográfico. A luz da foto non é a mellor, o día estaba brumoso. Xoguei a conseguir un muíño con seis aspas. Co retardo no disparo que teñen as cámaras dixitais non foi cousa fácil. Tratábase de compaxinar as aspas de dous muíños e ocultar o mastro do segundo. Velaí vos queda.
Ningún comentario:
Publicar un comentario