No cruzamento dos camiños, como corresponde, estende o cruceiro os seus brazos para acoller aos camiñantes.Á beira da vía que une Agolada con Gurgueiro e do ramal que aparta á aldea de A Costa.
Ten base trapezoidal e fuste biselado en chafrán. Os extremos dos brazos aparecen labrados en catro puntas de diamante.
Sucedeulle o que a moitos cruceiros, un golpe deu con el no chan e rompeu o fuste en dous anacos. Agora empatárono e entaboárono e para evitar as refregas das vacas enroscáronlle aramio de espiñas. ¿Coroa de espiñas?
Infórmame Fidel Torreiro de que o cruceiro foi feito por Manuel do Campo e sufragado por Dámaso Torreiro (pai de Manuel das Penas) en agradecemento a Deus por ter saído con ben das súas andanzas por terras de Cuba de onde retornara había pouco tempo.
O Farelo omnipresente ao fondo tras as casas de A Costa.
Dato anecdótico: Esta é a entrada número 300.
Ningún comentario:
Publicar un comentario