A FESTA DA FALA

Hai xa 25 anos tiven unha alumna, Isabel Fernández López de Perillo (Oleiros), que levaba a poesía nos ollos con tan só trece anos. Aquel maio de 1982 escribiu un poema do que vos ofrezo un fragmento. Era unha nena castelán-falante como a maioría dos seus compañeiros e non sei en que lingua falará agora. Pero o que escribiu, sentiuno en galego.

O dezasete de maio

reina unha gran ledicia,

xa entrada a primavera,

viste de festa Galicia.

Hoxe é dezaseis de maio

empezan a abrir as flores

para presentarse mañá

cheas de vivas cores.

¿Que che direi, meu neniño,

para que lembres este día?

Un "meu amor" en galego

sei que non o esquecerías.

Dígocho en galego

que non en castelán,

porque é festa na miña terra

e así a quero celebrar.