Chámaselle Chaos a unha zona chá. Os Chaos de Aián están á beira da aldea de Aián (As Trabancas). Este lugar ademais de dúas casas, un hórreo e un cruceiro ten a súa pequena historia. Aquí celebrábase unha feira antiga os días 12 de cada mes. Ata 1788. Aquel ano trasladaríase a outra pequena aldea situada a case catro quilómetros: Agolada. Os motivos foron varios. Os veciños de Aián e aldeas limítrofes expresaban queixas porque o gando que acudía ás feiras pisaba os terreos sementados e facía estragos nos cultivos. Por outra parte estaban as mellores comunicacións viarias e a situación central de Agolada. Sería o escribano das xurisdicións de Ventosa e Borraxeiros, D. Ramón Barrio de Losada, que vivía na súa casa de Agolada, quen faría os trámites pertinentes diante da corte de Carlos IV para solicitar o traslado. Na Real Cédula de concesión do devandito traslado esixíaselle contar cun recinto murado para albergar o gando.Nesta campa da foto, celebrouse pois a feira que podemos considerar o xerme da feira de Agolada. Non sabemos se xa entón existía o cruceiro. En calquera caso, é un cruceiro dos máis característicos desta zona: pedestal cúbico biselado en chafrán nas arestas superiores, varal prismático igualmente biselado, capitel cuadrangular con varias molduras e unha sinxela cruz cos brazos rematados en punta de diamante.
Ningún comentario:
Publicar un comentario