Adolfo Sarandeses Pallares de Ferreiroa ten unha extensa biografía. Para min é un amigo e o tío do meu excelente amigo Fidel Torreiro Sarandeses. Durante a adolescencia e xuventude fun pasar bastantes tardes con el acompañando a Fidel, que ía visitalo á súa Ferreiroa natal, onde Adolfo habitaba cal ermitaño na inmensa casona labrega con pasado fidalgo.Adolfo descende da fidalguía rural de Moas (Brántega). Unha ascendente súa casara co escribano don Ramón Barrio de Losada, fundador da feira de Agolada e responsable do traslado da Capela das Virtudes.
Adolfo é custodio dunha importante documentación que explica algunhas pasaxes da historia de Agolada. De momento tiven acceso a unha mínima parte por mor da enfermidade que afecta a Adolfo desde hai anos. Deixou Ferreiroa para recibir os coidados necesarios na residencia Los Magnolios de A Coruña. Alí estiven con el departindo durante dúas horas un día de agosto do verán de 2006. Hai uns meses souben que a súa enfermidade se agravara e aínda non tiven xeito de ilo visitar. Desde esta páxina envíolle un saúdo que sei que lle transmitirán e unha airexiña de lembranzas de Ferreiroa para procurarlle unha melloría na saúde. Noventa e un anos e toda a lucidez e a memoria acugulada de historia, de anécdotas e de agarimos.
Ningún comentario:
Publicar un comentario