O MUÍÑO DE RACAMONDE

Os ríos soen ser pródigos en boas paisaxes, o Arnego é un bo exemplo. Hai meses prometín neste blog facer unha visita aos muíños de Gurgueiro, á beira do Arnego. Cumplo coa promesa en parte, pois de dous só visitei un.

Desde a aldea de Gurgueiro parte un camiño rural en dirección suroeste que conduce a uns prados e bosques de piñeiros, carballos, bidueiros e ameneiros. O lugar emana paz porque un sábese afastado de todo. O río marca unha liña no fondo da paisaxe. Pódese vadear por uns pasais. Do outro lado, o bosque de Alperiz.
Estamos en Racamonde. Así é como se coñece o lugar. Alperiz e Racamonde, nomes de ascendencia xermánica, tan antigos coma eufónicos.

Alí, escondido baixo a espesura do bosque está o muíño, construído totalmente con pedra granítica, tellado e cume incluídos. E aínda en funcionamento.

A presa da auga está expedita, cousa pouco frecuente na actualidade.

Para acceder ao muíño hai que salvar a presa por unha pontella que consiste nunha simple lousa alongada.

Mapa topográfico da zona, onde se sinalan as situacións do Muíño de Racamonde a Ponte do Porto.