Mover as pernas é mover o corazón: camiñando ou pedaleando. Andar en bici é moito máis que mover o corazón: é abarcar o mundo coa alma, apreixar coa mirada a esencia da paisaxe, percorrer o territorio e sentilo tal cal é, vivir a amizade e o compañeirismo solidariamente.
Hai seis anos, un grupo de compañeiros (a maioría profesores no IES Laxeiro) creamos o Club alamBIKE para facer cicloturismo e deporte de mantemento. Neste grupo consolidei unha das miñas afeccións frustradas de neno e permitiume descubrir ou redescubrir todo o que me rodeaba.
Nos 
últimos anos os meus percorridos teñen obxectivos moi concretos: visitar todos os recantos de Agolada que teñan algún interese desde o punto de vista paisaxístico, natural, arqueolóxico, histórico, arquitectónico ou etnográfico.Coa cámara dixital como compañeira insubstituíble vou facendo moitas das fotos que vos ofrezo neste blog.
Nas fotos da dereita, feitas o 12 de abril de 2004, o grupo fundador do alamBIKE, na feira de Agolada e no camiño que entra en Ferreiroa desde Bidueiros.
Cinco compoñentes do alamBIKE estamos vencellados con Agolada, de aí que o poña entre os colectivos deste concello, anque a maioría dos seus socios e a súa sede social estean en Lalín.
Hello from New Zealand. I was searching the blog world when your blog popped up. I cannot understand the language, but I like your photos.
ResponderEliminarClick on my name if you want to have a look at my blogs.