IGREXA ROMÁNICA DE VENTOSA

O románico en Agolada ten un dos seus mellores expoñentes nesta igrexa de Ventosa. Conserva moi ben a portada e a fachada principal, a porta sur, os canzorros, o arco triunfal e a iconografía policromada dun baldaquino do século XV ou XVI. Outro elemento que lle dá relevo e a singulariza é o sartego do abade Lope de Ventosa. Está enmarcado baixo un casetón practicado na parede sur e rematado cun arco ricamente decorado. Baldaquino e sepulcro forman un conxunto escultórico de gran beleza e crense obras do mesmo autor.

As obras de restauración dos últimos anos, acertadas e necesarias, fanlle xustiza. Non así o paredón do cemiterio anexo. Os cemiterios habería que buscarlles outra solución. Á beira das igrexas réstanlles mérito aos templos. Sanitariamente non sei se é o mellor lugar.

Eu prefiro os enterramentos nun camposanto de herba cunha sinxela lápida chantada na cabeceira. E se se quere un muro perimetral baixo cercando o recinto. Puideran estar preto das igrexas pero non adosados a elas.