WINDOWS VISTA HOME PREMIUM

Antes ca Microsoft, os agoladenses xa inventaran un sistema operativo de igual nome, iso si, expresado en galego da casa. Máis ou menos podería ser: ventás con vistas estupendas desde o fogar. Ou mellor aínda: ¡que marabilla de vistas as das ventás destas casas!

Era e é un sistema perfectamente operativo porque canto máis te achegas á ventá mellor é a panorámica, e máis luminosa. Con contras de parar a luz ou sen elas. A discreción. É dicir, un sistema que funciona.
A configuración do sistema é ben sinxela: mampostería de esquistos e lousas de granito ou pizarrentas que enmarcan a fiestra de madeira, castiñeiro pura cerna, sen sámago. Ventás de dúas follas e seis vidros (ou sen eles). Sen eles é máis ventá porque entra máis vento. Ventá vén de vento. O vento que anova o osíxeno e que seca as humidades. Ventás das terras baixas de Agolada con arxilas e esquistos no subsolo e onde granito era un luxo carretado polas corredoiras nun ir e vir de chíos de eixes de freixo (se queres que o carro cante móllalle o eixe no río). Para engalanar as casas e os hórreos.
Windows Vista Home Premiun na arquitectura popular abandonada de Agolada. A foto superior corresponde á casa do Cabo en Pazos (Carmoega) e a inferior a Campo (Sesto).
As diferencias construtivas son claras . Na inferior non se usa en absoluto o granito e as ucheiras e o lintel da fiestra son de castiñeiro; o peitoril, bastante inusual, é unha lousa esquistosa trapezoidal invertida.
Ventás, fiestras, xanelas, meniñas e retinas da casa, gardades memoria da aldea, da paisaxe, dos coriscos nevados e das raxeiras estivais.