II ENCONTRO NOS PENDELLOS (I)

O 21 de agosto de 2005 foi outra data sinalada na historia de Agolada. Celebramos o II Encontro nos Pendellos, acto cultural e reivindicativo, no que homenaxeamos a D. Manuel Caamaño Suárez. Recibiu o galardón do "Pendello de Honra", que lle entregou D. Avelino Pousa Antelo, presidente da Fundación Castelao. D. Manuel Caamaño, profesor xubilado da Escola de Arquitectura Ténica de A Coruña, é autor do libro "As construcións da arquitectura popular". Neste libro, no apartado dos recintos de feira, dedica un capítulo aos Pendellos de Agolada, resaltando os valores que fan único este recinto. Quixemos recoñercerllo.
A Música e a Palabra protagonizaron os actos do día. A Quenlla, Bico da Balouta, Celso Fernández Sanmmartín levaron o peso musical e os contos. A palabra puxérona os directivos dos Amigos dos Pendellos, D. Avelino Pousa, D. Manuel Caamaño, os Directores Xerais de Patrimonio e de Difusión Cultural, D. Felipe Arias e D. Luís Bará, respectivamente, varios escritores e artistas.
A comida de confraternidade tivo lugar no Pazo de Eidián. E a tarde completouse cunha visita guiada ao Dolmen dos Muíños (en Bidueiros), á Ponte dos Cabalos e á igrexa de Ferreiroa.
Pola noite celebramos a I Noite das Candeas, cun éxito absoluto.
Dareivos máis información deste importante día en vindeiras entradas.