A CAPELA DAS VIRTUDES XA LOCE LIMPA

No medio do recinto dos Pendellos houbo desde 1791 unha capela en honra á Virxe das Virtudes, que fora trasladada desde as ribeiras do río Ferreiroa (é historia para outro día). Foi o primeiro e único lugar de culto que houbo en Agolada ata 1962. De aí en adiante o seu deterioro foi progresivo. Ultimamente estaba chea de lixo e vexetación invasora. O pasado xoves o Concello de Agolada procedeu á súa limpeza e agora ofrece un aspecto moito máis agradable. No presente ano 2007 a Consellería de Cultura restaurará completamente o edificio e o adro. Tamén a casa da Neves do Román, que se converterá en Centro de Exposicións das Feiras. Eses son, quizais os primerios froitos da andadura da Asociación "Amigos dos Pendellos".
O Concello de Agolada implicouse moi activamente na Festa dos Premios Esquío e desde a Asociación estimamos que esta colaboración e entendemento pode acadar importantes metas. Que sexa para o ben de Agolada.