A PRAZA DE NOITE

O ano pasado ocurríuseme formar a través de Internet unha comunidade de agoladenses de nacemento e de querencias. A idea era compartirmos entre nós información alusiva á terra que nos viu nacer. Deu algúns froitos, non moitos. Pero aínda é tempo. Eu comecei cos correos aos que bastantes responderon, que non todos. Non é que lles contase moitas cousas neles porque as circunstancias viraron. Cando dei nesta idea do blog, logo de facer un curso sobre aplicacións didácticas da fotografía dixital, vin a oportunidade de comunicarme por este medio mellor ca polo correo. E ofrecer aquí o que tiña pensado comunicar cos correos. De todos xeitos non son medios excluíntes e non desboto nin abandono a comunicación por correo electrónico.
Precisamente, o pasado Nadal enviáballes un Power Point persoal como felicitación no que figuraba a imaxe que aparece na foto, entre outras. Así lucía a praza de Agolada en decembro pasado, engalanada para o Nadal. É unha praza moi agradecida, sempre ofrece boas perspectivas. As luces miudiñas que adornaban os plátanos representaban unha orixinal constelación de paz na noite fría.