BRÉTEMAS E FUMES

O 30 de decembro amenceu cuberto por unha inmensa nube densa e grisalla e coa brétema pousada sobre os vales e regueiros. Esa miña afección de percorrer o mundo en bicicleta levoume novamente pola Pena Maior, excelente mirador que domina as terras ribeireñas do Ulla e acada unha ampla panorámica da provincia de A Coruña. E tíñame reservadas estas sorpresas que aquí vos amoso.

A columna de fume que se observa ao lonxe é o bafo quente que expulsa a enorme cheminea da central térmica de Meirama (segundo o mapa está a 56 kms. en liña recta). Conseguín aproximala cun obxectivo 340 mm. Téñoa visto moitas veces máis, pero nunca coma hoxe. O fume rubía ata o teito de chumbo do ceo e alí, coma un enorme trade, abría un círculo de luz que franqueaba o paso do sol e iluminaba o torso barroco e gasoso da impresionante fumareda.

Causa mágoa saber que o espectáculo visual vai acompañado da certeza da contaminación atmosférica con xofres causantes da choiva aceda. Consola saber que xa ten prazo fixado para pechar definitivamente. Daquela haberá de pousar a néboa de vez en cando sobre o enorme lago artificial que ocupará a poza que deixou baleira o lignito.