DOLMEN BIC

Hai dous días a prensa dábanos feliz noticia da resolución da Consellería de Cultura pola que pretende declarar Ben de Interese Cultural (BIC) corenta e oito xacementos arqueolóxicos repartidos por toda a xeografía galega, maiormente na zona do futuro Parque do Megalitismo na Costa da Morte. Digo feliz desde a perspectiva global e tamén desde a particular polo que atinxe a Agolada. Nos corenta e oito xacementos inclúese o Dolmen dos Muíños, sito en Bidueiros (Ferreiroa), mámoa que desde a Asociación Amigos dos Pendellos convertemos en obxectivo de valorización e difusión desde o momento en que tivemos noticia da súa existencia. Hai catro anos que emprendemos as accións encamiñadas a este fin. Delas queda constancia en varias entradas anteriormente publicadas neste blog:

Dolmen dos Muíños

Arqueólogos no dolmen dos Muíños

O dolmen dos Muíños

Breve historia dunha mámoa

Pinturas rupestres
A noticia do plan que pretende levar a cabo a Consellería aparecía na prensa dixital, nos seguintes termos:

Vieiros

La Voz de Galicia

Faro de Vigo

Os xacementos arqueolóxicos e a propia Arqueoloxía aínda carecen do recoñecemento da meirande parte do público. A concienciación vai medrando paulatinamente nos últimos anos. É sintomático que ata o momento presente só houbese catro xacementos megalíticos con protección BIC e agora dun só golpe se declaren corenta e oito dunha soa vez. Demostra igualmente a sensibilidade e mimo con que a actual Administración contempla o inxente Patrimonio, desde a realidade obxectiva de que é imposible actuar en todos eles con labores de excavación ou musealización. De aí a selección dos xacementos que gozan dunhas características que os destacan sobre os demais.
Agolada é un concello especialmente rico en patrimonio arqueolóxico: castros, petroglifos, mámoas, restos da civilización romana, etc. abundan con desigual proporción por todo o territorio municipal ata acadar os trescentos xacementos, todos eles merecentes de atención, difusión e coidados.